DE MORTE ET AMORE.

Errabat socio mors iuncta cupidine secum,
Mors phaeretras paruus tela gerebat amor.
Diuertere simul, simul una & nocte cubarunt,
Caecus amor, mors hoc tempore caeca fuit.
Alter enim alterius, male prouida spicula sumpsit,
Mors aurata, tenet ossea tela puer.
Debuit inde senex qui nunc acheronticus esse,
Ecce amat & capiti florea serta parat.
Ast ego mutato quia amor me perculit arcu,
Defficio inijciunt & mihi fata manum.
Parce puer, mors signa tenens uictricia parce,
Fac ego amem subeat fac Acheronta senex.